الفنانة الرقيقة مي عزالدن لها ذكريات جميلة مع المنبه .. تعالوا نشوف قالت ايه في مدونتها الخاصة :
نفسي اعرف مين اللي اخترع هذا الجهاز السخيف والمزعج المسمى بالمنبه ..
طول عمري باكره صوت المنبه ورناته المزعجة واصرارها المستميت على اني اصحى من أحلاها نومه .. اوقات كتيرة وانا صغيرة كنت باتعمد ابوظ المنبه في الخباثة قبل ما انام ولا من شاف ولا من دري علشان تروح عليا وعلى ماما نومة وبكده مش اصحى بدري علشان اروح المدرسة واقدر انام براحتي من غير دوشة ولا ازعاج ولا غلاسة المنبه ..
صحيح ان ماما قفشت الحكاية في مرة واخدت علقة محترمة بس أهي كانت حيلة والسلام على قد تفكيري وانا طفلة علشان اترحم شوية من الصحيان بدري ..
أما في الاجازات فكنت باتعمد اني اضبط المنبه على نفس ميعاد المدرسة علشان ادي لنفسي احساس اني قمت وقفلت المنبه وهانام براحتي وبكده افش غليلي شوية من اللي كان بيحصل لي ايام الدراسة .. تصوروا ان نفس عقدة المنبه دي موجودة معايا لغاية دلوقتي ..
بابقى في غاية الغيظ لما باكون نايمة نوم عميق والاقي "ترلململململململم" بتعزف مارشيدرات ولا أجدع موسيقى عسكرية وطبعاً لازم اصحى علشان عندي تصوير الصبح بدري والناس مستنية .. حاولت كتير اصلح العلاقة بيني وبين المنبه لكن فشلت ..
انا بانام متاخر وإنسانة ليلية بطبعي لكن المنبه بيصحى من النجمة .. يعني مفيش وفاق ولا اتفاق بينا .. بذمتكم مش معايا حق برضه..